Montana Bybelskool het in Januarie 2013 begin te Ilala Palm Lodge se kapel, en is werklik interkerklik maar nie sonder basiese beginsels nie.

Nadat ons eers fisies weekliks bymekaar gekom het vir 5 jaar het werksdruk en omstandighede gedwing dat lesings videos tans net op die webwerf geplaas word. Dit is nie heeltemal die ideaal nie en neem daardie heerlike informele samesyn tussen gelowiges weg. Ons bly hoop om weer in daardie rigting te beweeg.

Ons het aanvanklik, begin met 5-6 mense en het later gegroei tot so 18-20 mense wat dit gereeld bygewoon het, en selfs met die klein intieme informele groepie was ons mense wat uit 4 of meer verskillende kerklike denominasies kom. Ons kom tans net op 'n ad hoc basis bymekaar om spesifieke onderwerpe te behandel.

Die woord Bybelskool is dalk nie die regte woord vir ons Bybelgroepie nie, meer soos ’n Woordskool, want daar word nie toetse en eksamens afgelê nie. U kan rustig kom sit en luister en betrokke raak in die mate waartoe u graag sou wou. As daar ’n onderwerp of ’n vraag is, is u welkom om dit in die groep te vra of privaat en ons sal dit op daardie manier hanteer.

Ons glo verseker aan die 5 Solas, maar die hoofdoel is nie om enige teologie van ’n spesifieke denominasie in enige iemand se keel te probeer afdruk nie. Die hoofdoel is soos hieronder beskryf dat alle mense die Bybel kan leer ken en liefkry.

DOEL

Die hoofdoel is dat alle mense die Bybel beter leer ken en die Bybel kan begin liefkry as die Woord van God. Verder en hoofsaaklik die God van die Bybel kan leer ken vir wie Hy werklik is. Dit gaan dus nie hier oor enige spesifieke teologie of dogma nie, maar net kennis oor hoe die Bybel as die Woord van God. Waar die Woord vandaan kom, en hoe dit ontstaan het, asook hoe dit ingedeel is en hoe ons daarna moet of kan kyk en moontlik interpreteer. Die webblad is geskep sodat die persone wat die lesings bywoon dit later op hul eie tyd kan aflaai, maar enigeen is welkom om dit te gebruik en aan te pas vir eie gebruik.

Hos 4:6  "My volk gaan te gronde weens gebrek aan kennis; omdat jy die kennis verwerp het, sal Ek jou verwerp, sodat jy vir My die priesteramp nie sal bedien nie; omdat jy die wet van jou God vergeet het, sal Ek ook jou kinders vergeet."